Zani i Naltë – Zhvillohet programi artistik “Rrugëtimi i Ramazanit ndër ne”

Zhvillohet programi artistik “Rrugëtimi i Ramazanit ndër ne”

May 22, 2018 Zani i Nalte Aktivitete 0

Departamenti i Shkencave Islame dhe Klubi “Mesazhi i Jetës” më 22 maj 2018 organizuan programin artistik me titull: “Rrugëtimi i Ramazanit ndër ne”, ku studentët, nëpërmjet kumtesave të ndryshme dhe fjalës artistike përcollën rëndësinë dhe vlerën e këtij Muaji të Madhërueshëm.

Pas hapjes së programit me lexim Kur’ani nga studenti Abdullah Ziba, i pranishëm në aktivitet, nënkryetari i Komunitetit Mysliman të Shqipërisë, z. Lauren Luli në fjalën e tij përshëndetëse, iu drejtua të pranishmëve duke thënë se muaji i agjërimit është muaji, ku njeriut i bëhet thirrje që veprimtaritë tona të përditshme të kalojnë në një kritikë të atillë, sa ta bëjnë njeriun të fitojë njohuri më reale të qëllimit dhe jetës së tij, ta përafrojnë atë sa më shumë drejt origjinës së tij shpirtërore.

Ndërsa Dr. Genti Kruja, Përgjegjës i Departamentit të Shkencave Islame, bëri një retrospektivë se si sot ne kemi mundësinë ta ndajmë këtë begati të Zotit në shoqërinë tonë, kundrejt kohës kur sistemi komunist kishte ndaluar ritet fetare në Shqipëri. Ai gjithashtu në fjalën e tij nuk la pa përmendur shembullin e H. Sabri Koçit i cili për 20 vite në burg nuk e la agjërimin për asnjë moment, edhe pse në kushte ekstreme të mbijetesës.

Aktiviteti vijoi më pas me kumtesa, ilahi e poezi të sjella bukur për të pranishmit nga studentët e këtij klubi. Studentja Sonila Habili ndau me publikun fjalët e një njeriu, që e kishte përjetuar fundin e jetës së tij me agjërim. “Aspekti shpirtëror dhe intelektual i agjërimit”, ishte kumtesa me të cilën studentja Zerina Kupe, i hodhi një vështrim praktikës së agjërimit për gjatë historisë njerëzore tek popujt dhe fetë më të vjetra. Poezia “O i mbuluar” kushtuar Profetit Muhamed (paqja dhe bekimet e Allahut qofshin mbi të) u recitua nga studentja Suela Mehmeti. Gjithashtu pjesë e këtij aktiviteti ishin edhe klubi i muzikës ku kënduan disa ilahi rreth Ramazanit. Më pas studentja e masterit Enxhi Hasmeta recitoi një poezi kushtuar Krenarisë së Njerëzisë, Hz. Muhamedit (a.s). Duke qenë se Ramazani është muaji i agjërimit, sakrificës, adhurimit dhe lutjes programi u përmbyll me një dua në fund.