Zani i Naltë – Shfaqet dokumentari premierë “H. Hafiz Sabri Koçi, pishtar i lirisë së besimit”

Shfaqet dokumentari premierë “H. Hafiz Sabri Koçi, pishtar i lirisë së besimit”

Nov 06, 2015 Zani i Nalte Aktivitete 0

Me rastin e 25 vjetorit të lirisë së besimit në vendin tonë (nëntor 1990 – nëntor 2015), Komuniteti Mysliman i Shqipërisë në bashkëpunim me Ministrinë e Kulturës, ka shfaqur dokumentarin “H. Hafiz Sabri Koçi, pishtar i lirisë së besimit”.

Kryetari i Komunitetit Mysliman të Shqipërisë, H. Skender Bruçaj, theksoi se Hafiz Sabri Koçi ishte njeriu model që gërshetoi në personalitetin e tij vlerat e besimit dhe diti t’i mbrojë ato në kohë të vështira, duke sakrifikuar 20 vjet nga jeta e tij, por duke ruajtur në të njëjtën kohë dinjitetin e një besimtari dhe njeriu të mirë.

“Hirësia e tij H. Sabri Koçi u bë për shqiptarët simbol i liderit të drejtë, besimtarit të mirë, mikut më të afërt, atdhetarit të flaktë, si dhe flamurtar i rimëkëmbjes së vlerave njerëzore në vendin tonë”, tha z. Bruçaj.

Ministrja e Kulturës, znj. Mirela Kumbaro, theksoi se nuk është e rastësishme që një personazh si Hafiz Sabri Koçi, të ndërthuret në historinë e vendit apo të dalë në një nga periudhat më dramatike të historisë sonë, siç është periudha e diktaturës.

“Në nëntor kanë ndodhur shumë ngjarje të rëndësishme të historisë sonë dhe një prej tyre është liria e besimit. Falë një njeriu si Hafiz Sabri Koçi ne jemi këtu sot, për të gëzuar atë liri që ata fituan duke sakrifikuar jetën, për të gëzuar në radhë të parë lirinë e mendimit, fjalës dhe besimit”, vlerësoi znj. Kumbaro.

Ndërsa Myftiu i Kosovës, z. Naim Tërnava, theksoi se të rikujtosh figurën e Hafiz Sabri Koçit, do të thotë të rikujtosh një të kaluar të hidhur në aspektin fetar, por të rikujtosh edhe shpresën e ardhmërinë e sigurt në besimin në Zotin, të lirë, duke respektuar besimin e njëri-tjetrit dhe duke qenë shembull për botën.

Drejtori i Kulturës në KMSH, Dr. Genti Kruja, gjatë prezantimit të aktivitetit theksoi faktin se ngjarjet e 25 viteve më parë janë quajtur me të drejtë triumfi i besimit, triumfi i lirisë mbi frikën.

Në premierën e dokumentarit ishin të pranishëm përfaqësues të komuniteteve të tjera fetare në vend, ambasadorë, deputetë, përfaqësues nga bota e artit dhe e kulturës, familjarë e të afërm të Hafiz Sabri Koçit.

Në këtë dokumentar me skenar të gazetarit Genti Hazizi, janë shfaqur për herë të parë pamje të rihapjes së xhamisë së Et’hem Beut, 18 janar 1991; dokumente historike, intervista e dëshmi për Hafiz Sabri Koçin, si dhe pamje nga rihapja e Xhamisë së Plumbit më 16 nëntor 1990. Ky dokumentar është një prodhim i KMSH-së në bashkëpunim me Ministrinë e Kulturës.